20. 1. 2015: Скінчіли Інтернетовы новинкы АРК в СР

Як на сайтї Інтернетовых новинок Академії русиньской културы в Словеньскій републіцї інформує шефредактор Александер Зозуляк, же новинкы ку кінцю рока 2015 скінчіли своє діяльство. Выходили од 2009-го року.

Зозуляк пише, же рік 2015 быв про редакцію інтернетовых новинок АРК в СР дотеперь єдным із найтяжшых на їх приправу і выробу, главно односно мізерной штатной дотації. „В новім роцї уж інтернетовы новинкы Академії русиньской културы в СР не будуть выходити. Намісто того будеме дале продовжовати у розвитку нашой вебовой сторінкы під таков самов назвов, вкладанём до окремых єй рубрік найінтереснїшых і найважнїшых справ з історії і сучасного културно-сполоченьского жывота Русинів. Самособов, то є наш план, але ці досправды будеме продовжовати у розвитку нашой вебовой сторінкы www.rusynacademy.sk, то буде залежати на схвалїню і запропонованю належной штатной дотації одборнов комісіёв про русиньску народностну меншыну при Урядї  уповномоченого про народностны меншыны Влады Словацькой републікы, як і на рїшіню спомянутого уряду,“ інформує дале Александер Зозуляк.

АРК в СР взникла у 2005-ім роцї в рамках Світовой академії русиньской култлуры, котру у 2002-ім роцї засновав Штефан Чепа як академічну і харітатівну інштітуцію із цілём стімулації новой роботы і всокочіня богатства на хосен цїлого людства. Інтернетовы новинкы зачала АРК в СР выдавати у 2009-ім роцї як тыжденник.

На початку мали новинкы три языковы мутації. Выходили в русиньскім, словацькім і анґліцькім языках. Із причіны все низшой державной дотації поступно словацька і анґліцька языковы мутації перестали выходити і зістала лем русиньска верзія, де з часу на час обявили ся статї по словацькы. Остатня дотація на 2015 рік про Інтернетовы новинкы АРК в СР была у вышцї 1000 €. Академія жадала про фунґованя новинок суму 4860 €. Рік передтым были новинкы підпорены лем сумов 500 €, причім было жаданых 5700 €.

Петро МЕДВІДЬ